ភ្នំពេញ៖ រដ្ឋមន្ត្រីក្រសួងកសិកម្មបានលើកឡើងថា កម្ពុជាបច្ចុប្បន្នបានផ្លាស់ប្ដូរការចិញ្ចឹមសត្វជាលក្ខណ:គ្រួសារ ទៅជាការចិញ្ចឹមដើម្បីពាណិជ្ជកម្មវិញ តាមរយៈការចិញ្ចឹមក្នុងកសិដ្ឋាន ជាបណ្តុំ ដោយបានអនុវត្តផលិតកម្មកសិកម្មតាមកិច្ចសន្យា ដើម្បីធានាបានបរិមាណផ្គត់ផ្គង់និងគុណភាព។

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានលើកឡើងបែបនេះក្នុងឱកាសប្រារព្ធពិធីសម្ពោធដាក់ឲ្យដំណើរការជាផ្លូវការ រោងចក្រផលិតចំណីសត្វខ្នាតអន្តរជាតិមួយ នៅខេត្តកំពង់ស្ពឺកាលពីថ្ងៃទី២៤ ខែមេសា ឆ្នាំ២០២២។

លោកបន្តថា ផ្ទៃដីចម្ការស្រែជាង ៩០% ត្រូវបានភ្ជួររាស់ដោយគ្រឿងយន្ត រីឯសត្វគោ ក្របី ត្រូវបានប្តូរតួនាទីពីការចិញ្ចឹមដើម្បីយកមកធ្វើការភ្ជួររាស់ ទៅជាការចិញ្ចឹមសម្រាប់យកសាច់វិញ។ នេះជាសក្ខីភាពមួយបង្ហាញឲ្យឃើញថា អនុវិស័យផលិតកម្មសត្វបាននិងកំពុងបោះជំហានឡើងជាបន្តបន្ទាប់ ឆ្ពោះទៅគោលដៅមួយដែលរាជរដ្ឋាភិបាលកម្ពុជាចង់បាន គឺជាការអភិវឌ្ឍន៍អនុវិស័យនេះ សំដៅលើការលើកកម្ពស់ស្តង់ដារចិញ្ចឹមតាមរយ:ការប្រើប្រាស់ពូជសុទ្ធ គុណភាពចំណី និងមាត្រដ្ឋាននៃការគ្រប់គ្រងកសិដ្ឋានប្រកបដោយសុវត្ថិភាព សុខភាពសត្វ និងភាតរៈបរិស្ថាន ហើយចុងក្រោយផលិតបាន ផលិតផលសាច់មានគុណភាព ធានាបានសុខភាពសាធារណ:។

លោកបន្ថែមថា ក្រុមហ៊ុនផលិតចំណីសត្វ បានចូលរួមចំណែកបន្ថែមទៀតក្នុងការលើកកម្ពស់ និងជំរុញផលិតកម្មចំណីសត្វក្នុងស្រុក កាត់បន្ថយការនាំចូល បង្កើតការងារជូនប្រជាជន បង្កើនចំណូលគ្រួសារ។ ជាមួយគ្នានេះ លោកណែនាំឲ្យក្រុមហ៊ុនគួរសិក្សា និងស្រាវជ្រាវបន្ថែមលើការផលិតចំណីត្រីឆ្តោរ ដើម្បីជំនួសឲ្យការប្រើវត្ថុធាតុដើមជាកូនត្រីដែលចាប់ពីប្រភពធម្មជាតិ។

លោកជំរុញ និងលើកទឹកចិត្តឲ្យប្រើប្រាស់វត្ថុធាតុដើមក្នុងស្រុក តាមរយ:ការ ធ្វើកិច្ចសន្យាផលិត ប្រមូលទិញពីកសិករ ដើម្បីកាត់បន្ថយការនាំចូល។ លើសពីនេះ ក្រុមហ៊ុនគួរបង្កើតកសិដ្ឋានចិញ្ចឹមសត្វ ឬក៏ត្រូវចុះកិច្ចសន្យាជាមួយអ្នកផលិត ដើម្បីជួយផ្សព្វផ្សាយពូជ និងបច្ចេកទេស និងដើម្បីធ្វើការពិសោធន៍គុណភាពចំណីសត្វផងដែរ៕